Таңһчин эрүл-менд харлһна министерствин көдлмшин ашин болн өөрхн иргчин җилмүдт күцәх үүлдврин зөрүллтин тускар келҗ өгв. Элст болн Лагань балһсдын бичкдүдин поликлинкст күүкдин болн эк-эцкнрин төлә таалмҗта таал тогтагдв. Судцна региональн цутхлң, гүлгн гемәс хөрлһнә Э.С.Тимошкаеван нертә таңһчин диспансер,  нилхд төрлһнә О.А.Шунгаеван нертә цутхлң медицинск оборудованяр теткгдв. Таңһчин цуг эмнлһнә организацст компьютерн оборудовань болн зәңгллһнә систем йилһҗ өгсмн. Приютное селәнд таңһчин психоневрологическ диспансерт түрүн болҗ капитальн ясвр кегдв.

50 миңһн болн энүнәс баһ тоота күн бәәдг балһсдт болн селәдт көдлхәр ирсн 50 нас күрәд уга эмчнрт болн фельдшермүдт демин мөңг өгчәнә. Таңһчин правительств болн Москва балһсна хоорнд залһлда батрҗ, нөкцлтин үүлдврин ашт регоина эмнлһнә учрежденьст орндгуд зөөҗ авч ирҗәнә. Таңһчин бичкдүдин эрүл-менд харлһна халхиг делгрүллһнә йовудт Сарпан болн Яшалтан райодын цутхлң больницс эмнлһнә оборудованяр теткхгдх. Тер мет судцна региональ цутхлңгин болн гүлгн гемәс хөрлһнә таңһчин диспансерин материальн-техническ көрңгнь цааранднь батрулхмн.

Эмнлһнә учрежденьсиг мергҗлттә медицинск көдләчнрәр тетклһнә төр хаһлгдх. Көчтнрә района Ергенинский селәнд олна эмчин дамшлтын әңгин төлә шин гер тосхгдх, тер мет Баһ Дөрвдә района Тундутово селәнд олна эмчин дамшлтын офисин гер бәрх. Хальдврта гемәс хөрлһнә шин больниц тосхлһна туск төрәр таңһчин һардвр федеральн цутхлңла күүндвр кеҗ, эн чинртә  кергиг күцәхәр шунҗана. Тер мет Хальмг Таңһчиг делгрүллһнә онц көтлврин йовудт дәәнә ветеранмудын госпиталь , П.П.Жемчуевин нертә таңһчин больницд онкологическ корпус тосхлһна төсвин-тооцана цаасинь ухалҗ белдҗәнә. «Лукойл» ПАО-н болн «КТК-Р» АО-н буйнч седклин дөңгәр Троицкое селәнд поликлиникиг болн Ик Буурлд больнициг капитальн кевәр ясхар зуралҗана.

2024 җил күртл цуг медицинск көдләчнрин көдлмшч ормс компьютерн оборудованяр болн кергтә болдг зәңгллһнә системлә залһлһна көтлврин теткврәр теткгдхмн.