Яшкульск района Молодежненск дундын школд спортивн залын капитальн ясвр төгсв. «2020-2021 җилмүдт селәнә һазрт болн бичкн балһсдт бәәдг сурһуль-эрдмин организацст физическ сойлар болн спортар соньмсхин төләд таал тогталһна тускар» гидг таңһчин правительствин тогтаврла ирлцәтәһәр иим керг-үүлдврмүд давулгдв. Тер мет школд саадгар халһна спортивн клуб секгдв. Школ күцц кевәр спортивн оборудованяр болн инвентаряр теткгдв.

Тер мет Утта селәнә В.Ширяевин нертә дундын школын сурһульчнрт спортар дамшх арһ учрв. Селәнд күчтә гидг спортивн бәәрн тосхгдв. Ик баһ уга нааран ирҗ, цогц-махмудан батрулна. Яшкулин дундын школд футбол нааддг һазр белдҗ кеҗәнә. Эн төсв күцәлһнд «Хевел» ООО мөңг йилһҗ һарһв. Яшкулин һазра улс спортивн халхар бәрсн күцәмҗәрн бахмҗ кенә.  Ода эдн олн зүсн янзин спортар соньмсх  арһта.