Һаха сарин 17-д таңһчин Толһачин даалһврар РСФСР-ин ачта артистк, Хальмгин Герой Валентина Нимгировна Гаряева Төрскндән ач-тусан күргснә төлә II девсңгин ордена медаляр ачлгдв. 2020 җилин февраль сарин 10-д Әрәсән Федерацин Президент ачллһна туск Зәрлг батлв. Олна үүлдвр шунмһаһар күцәснә төләд ачлгдсна тускар бәрмт цааснд темдглгдҗәнә.

Валентина Гаряева нернь туурсн хальмг дууч, Хальмг АССР-ин болн Әрәсән ачта артистк, Әрәсән Федерацин улсин артистк, СССР-ин «Олн әмтнә иньгллт» орденә кавалер, Хальмг Таңһчин Күндтә иргн. 1963 җилд 6-ч дуудлһна Хальмг АССР-ин Деед Хүүвин депутатд суңһгдсмн, 1972 җилд Хальмг АССР-ин О.И.Городовиковин нертә государственн мөрән лауреат болсмн, 2014 җилд Хальмгин Герой гидг цол зүүсн болдг.

Валентина Нимгировна өнр-өсклң өрк-бүлд төрсмн. Төрхләрн Нәәмн нер зүүсмн, болв итклин цааснд Валентина гиҗ бичгдсмн. Энүнә үүдәлтин хаалһнь хальмг улс Сиврәс төрскн һазрур ирснә җилмүдт эклв. 1958 җиләс авн «Бамб цецг» («Тюльпан») ду-бииһин ансамблин солистк болҗ үүлдҗ йовсмн. 1969 җилд Цугсоюзн театральн эстрадн мастерской төгсәсмн. Валентиан Гаряева ут ду ончта кевәр дуулдгнь темдгтә. 1978 җилд олн-әмтнә ду дуулдг дуучнрин Цугсоюзн болн Цугәрәсән дипломант болв. 1979 җилд Элстин искусствин училищ төгсәсмн, 1985 җилд – Хальмг ик сурһулин филологическ факультет.