Әрәсән правительствин Ахлач Михаил Мишустин COVID-19 гемәр гемтсн әмтнд дөң болҗадг эмчнрт урмдулгч мөңгиг цааранднь чигн өгхиг шиидв. Эн мөңгиг хулһн сарин 15 күртл өгхин туск тогтавр белн. «Президентин седвәрәр эмчнрин төлә урмдулгч мөңгиг дәкәд нег сард өгхиг правительств шиидв. Урдк кевәр амрлһна кемиг учрт авч, дәкнәс тооца кегдх», - гиҗ Мишустин темдглв.

        Эн кергт 22 җува шаху арслң йилһҗ өгхин тускар һаха сарин эклцәр правительств зарлсн билә. Әрәсән Президент эн җилин мөрн сард медицинск көдләчнрт һурвн сардан демин мөңг өгхиг батлсн билә. Дарунь эн мөңгиг зун чилтл өгхиг шиидсмн. Эмчнрин төлә урмдулгч мөңгнә кемҗән 80 миңһн арслң тогтаҗана, дунд медицинск көдләчнрт 50 миңһн арслң өгчәнә, баһ медицинск көдләчнрт- 25 миңһн арслң, бачм дөңгин эмчнрт – 50 миңһн арслң, бачм дөңгин фельдшермүдт, медицинск көдләчнрт болн җолачнрт – 25 миңһн арслң.