Хальмг Таңһчин Толһач Бату Хасиков батлсн Зәрлгәс иштә мана таңһчд хаслһна диг-даран бар сарин 13 күртл утдулгдв. Коронавирус гемәс хөрлһнә бачм бәәдлин штабин үнллһәр хаслһна диг-дараг ууруллһна дарук девсңд орхин төләд таңһч тогтун эпидемиологическ бәәдлин үзмҗд күрәд уга.

Таңһчд гемәс саглуллһна эв-арһс тер кевәрн күцәгдҗәнә. Олн улс хурдг һазрт әмтн чирәдән халхц зүүх, хоорндан нег-негнәсн күсдундур метр холд бәәх зөвтә. 65 һарсн наста улс гертән бәәлһнә диг-дара күцәҗәнә.

Коронавирус гемәс хөрлһнә бачм штаб үкр сарин 29-д кесн то-дигәр, сүл хонгин эргцд дәкәд 89 күн гемтв. Хальдврта гем эклҗ түгсн кемәс авн ут тоодан 11 658 күүнд гем хальдсн болдг. Коронавирус гемәс көлтә 140 күн өңгрсмн. Хальдврта гем эклҗ түгсн цагас авн мана таңһчд ут тоодан 9 560 күн эдгв. Ода эдн эмнлһ авсна хөөн эрүл-мендән батрулҗ ясруллһна керг-үүлдврмүд күцәх йоста.