Таңһчин эрүл-менд харлһна министр Юрий Кикеновд шин коронавирусн хальдврта гемәс хөрлһнә тәрлһ кев. «Гам-КОВИД-Вак» вакцин энүнд тәрв гиҗ таңһчин эрүл-менд харлһна министерств зәңглв.

Хальмгт әмтиг шин коронавирусн хальдврта өвчнәс хөрлһнә тәрлһ кеҗәнә. Олн әмтнә 60 процентд тәрлһ кехәр зуралҗана. Н.Ф.Гамалеин нертә Келн-улсин шинҗллтин цутхлң кеҗ һарһсн «Гам-КОВИД-Вак» («Спутник V») вакцин болн болн Роспотребнадзорин «Вектор» государственн номин цутхлң ухалҗ белдсн «ЭпикВакКорона» вакцин таңһчд бәәнә. Ода деерән миңһн күүнд күртәмҗтә. 2021 җилин түрүн һурвн сарин эргцд дәкәд 12 миңһн күүнд күртәмҗтә вакцинәр таңһчиг теткх.

Хамгин түрүнд эрүл-менд харлһна, сурһуль-эрдмин болн олн улсла харһҗ көдлдг халхин әмтнд тәрлһ кех зөвтә гиҗ барин цергллт зәңглҗәнә. Ода деерән таңһчин эрүл-менд харлһна халхд көдлдг 300 һар күүнд тәрлһ кегдсмн. Таңһчд шин коронавирусн хальдврта гем эклҗ түгснәс авн 16064 күн гемтв, эднәс 13355 эдгв, эн гемәс көлтә 218 күн өңгрҗ одв. Таңһчд 13 госпиталь үүлдҗәнә, ут тоодан хальдврта гемтә улсин төлә 1095 орндг бәәнә, эднәс 367 – ки авлһна аппаратта.