Художественн гимнастикәр таңһчин хамцу команд ЮФО-н болн СКФО-н Первенствд орлцҗ, цаһан мөңгн медаль шүүҗ авв гиҗ Хальмгин спортын министерствин барин цергллт зәңглв.

Туула сарин 12-ас авн 16 күртл Нальчик балһснд Өмн үзгин болн Ар Кавказин федеральн округудын художественн гимнастикәр Первенств давв. Энүнд 45 команд орлцв, тер тоод Хальмгин хамцу команд бас орлцв. Энүнә ханьд олимпийск көрңгин республиканск спортивн школын спортсменкс, художественн гимнастикин таңһчин Федерацин гимнасткс Дарина Анджукаева, Анна Вадбольская, Ирина Водопьянова, Элиана Свириденко, Карина Маштабдулова орҗ, марһанд мергҗлтән, чадмган үзүлҗ ончрв. Марһана ашар мана гимнасткс хойрдгч орм эзлв.