3 наснас авн 7 нас күртл бичкдүдт демин мөңгиг мөрн сар күртл урднь батлсн диг-дараһар өгх. Сар болһн өгдг демин мөңгнә кемҗән Хальмгт бичкдүдин төлә сарин теҗәлин кемҗәнә 50 процент тогтаҗана гиҗ таңһчин социальн делгрлтин, күч-көлснә болн көдлмшәр тетклһнә министерствин барин цергллт зәңглв.

2020 җиләс авн эн демин мөңг авчах улсин төлә терүнә кемҗән туула сарас авн моһа сар күртл хүвршго. Тедн тер кевәрн 5105,5 арслң авад бәәхмн.  2021 җилин туула сарас авн моһа сар күртл түрүн болҗ демин мөңг авлһна туск эрлһ орулхла, 5463 арслңга демин мөңг өгх. Өдгә цагт сар болһн өгдг демин мөңгнә кемҗәг хүврүлһнә туск зөв-йосна цаас Әрәсәд ухалҗ белдҗәнә.

Демин мөңгнә кемҗәг өрк-бүлин оруһин кемҗәнлә ирлцүлхәр зуралҗана. Сарин теҗәлин мөңгнә кемҗәнәс баһ теткүлтә өрк-бүлмүдин төлә демин мөңгнә кемҗәг өөдлүлх. Региональн сарин теҗәлин мөңгнә кемҗәнә 75 процент эс гиҗ 100 процент тогтахмн. Эн туст зөв-йосна актмудт сольврмуд орулҗ батлсна хөөн шинрлт орулсна болн эрлһс орулҗ авлһна тускар социальн делгрлтин, күч-көлснә болн көдлмшәр тетклһнә министерств зәңглх. Өөдән кемҗәтә демин мөңг авлһна туск эрлһ мөрн сарас авн орулҗ болхмн.