Таңһчин әмтн Госуслуги болн Калмдоктор порталар дамҗад, шин коронавирусн хальдврта гемәс хөрхин төләд тәрлһ келһнә чеерүдт бичүлгдҗ чадҗана. Энүнә тускар Хальмгин эрүл-менд харлһна министерствин барин цергллт зәңглҗәнә.

Эврә сән дурар шин коронавирусн хальдврта гемәс хөрлһнә тәрлһ бийдән кехәр седҗәх улс эврә һазрт бәәдг поликлиникд телефоһар җиңнүлҗ бичүлгдҗ чадҗана. Тер мет Госуслуги федеральн порталд электронн чеерүдт бичүлгдҗ болхмн.

Өдр болһн 9 часас авн 12 час күртл госуслуги сайтар дамҗад, чеерүдт бичүлгдҗ болҗана. Көдлмшин өдрмүдт 12 часас авн 14 час күртл 89613953150 телефона тойгар җиңнүлҗ, бас чеерүдт бичүлгдҗ болхмн. Кен негнәннь чеерүднь өөрдҗ ирхләнь, поликлиникин көдләчнр энүнә тускар зәңглҗ, тәрлһ келһнд эдниг дуудхмн.

Эндр өдр 500 күүнд тәрлһ кев. Таңһч ут тоодан миңһн күүнд күртх вакцинәр теткгдв. Җилин эклцәр таңһчд вакцинә 12 миңһн доз авч ирхмн. Таңһчд әмтнд тәрлһ келһнә 13 пункт секгдв. Эннь 12 района муниципальн бүрдәцд болн Элст балһсна поликлиникд тиим ормс бүрдәгдв.