Әрәсән дотр-дундын кергүдин министр РФ-н полицин генерал Владимир Колокольцев видеоконференцин диг-даранд ведомственн медицинск организацсин көдләчнриг дембрлттә бәәдлд ачлв гиҗ таңһчин МВД-н барин цергллт зәңглҗәнә.

«Өдгә цагт министерствин медлд 122 медицинск организац, тер тоод 77 стационар, үүлдҗәнә. Әрәсән МВД-н медлд ордг эрүл-менд харлһна халхд гүн медрлтә, өөдән мергҗлттә специалистнр көдлҗәнә. Эдн дунд 30 күн медицинск номин доктор цол зүүҗәнә, 400 һар күн – медицинск номин кандидат», - гиҗ ведомствин һардачин үгнь барин цергллт күргҗ медүлҗәнә.

Удан цагин эргцд дотр-дундын кергүдин органмудын көдләчнр коронавирусн хальдврта гем түглһнә кем эклснәс авн күчр-күнд таалд көдлҗ, зөв-йос харлһна керг күцәҗәнә. «Ахр болзгт ведомственн медицинск учрежденьс хүврсн бәәдлд иҗлдҗ чадв. Москвад клиническ госпиталиг коронавирус өвчәр гемнсн улсиг эмндг госпитальд хүврүлв. Медико-санитарн әңгүд болн поликлиникс рентгеновск компьютерн томографар, COVID-19 илдкхин төлә шинҗллт кедг биологическ станцсар теткв. Саглуллһна эв-арһс хулдҗ авгдв. Цуг эн күцәгдсн керг-үүлдврмүдин нилчәр дотр-дундын кергүдин органмудын көдлчәнрин дунд коронавирусн хальдврта гемәр гемтсн йовдлмудын то баһрҗана», - гиҗ министр темдглв. Эннь өдр сө уга арһ-чидлән нөөлго көдлҗәдг эмчнрин, медицинск көдләчнрин үүлдврин ашнь мөн. «Тадн йоста баатрмуд. Әәмшгәс әәлго хамдан көдлдг улст килмҗән тусхаҗ, эдниг эмнҗ, эрүл-мендинь харҗ, әминь аврҗ, әрүн чинртә керг күцәҗәнәт», - гиҗ эн келв.

Әрәсән МВД-н медлд үүлддг медицинск организацсин 26 көдләчиг ачлв. Тер тоод таңһчин МВД-н медико-санитарн әңгин көдләчнр – медицинск сестра Дарья Емцеван болн государственн санитарн-эпидемиологическ бүртклһнә цутхлңгин ахлач, эмч-эпидемиолог Джиргал Мухараеван күч-көлсинь темдглв. Дарья Емцева Әрәсән МВД-н Күндллһнә һашгар ачлгдв, Джиргал Мухараева РФ-н дотр-дундын кергүдин министрин Ханлтар темдглгдв.