Сүл цагт олнд зәңгллһнә эв-арһст Хальмг Таңһчд әмтиг усар тетклһнә туск нәрн төриг дару-дарунь босхна. Энүнә тускар РФ-н Мөшклһнә комитет зәңглҗәнә.

Регионд зуг 7,4 процент әмтн сән чинртә уудг усар теткгдсн бәәнә. Урднь Хальмгт усар тетклһнә көтлвр күцәлһнә кергт бюджетәс мөңг йилһҗ өгсн билә.

2014 җилд «Ики-Бурульский групповой водопровод с подключением к Северо Левокумскому месторождению подземных вод Республики Калмыкия» гидг объект тосхлһна төлә «Управление Калммелиоводхоз» ФГБУ-д федеральн бюджетәс йилһҗ өгсн мөңгиг хулхасмн. Шаңһа мөңг хулхалсн йовдлын туст мөшклһнә органмуд уголовн керг-үүл бүтәсмн. Хөөннь эн керг-үүлиг гемшәлһнә ашлврла хамднь зарһд орулсн билә.

Әрәсән Мөшклһнә комитетин ахлач Александр Бастрыкин мөшклһ кеснә ашар эн уголовн керг- үүлин илдкгдсн цуг учрин тускар тодрхаһар зәңглх даалһвр Хальмг Таңһчд үүлддг Әрәсән СК-н СУ-н һардачд өгв.