Хальмгин вице-премьер Наран Кюкеев таңһчд усар тетклһнә туст тогтсн бәәдлин, федеральн правительств дөң күрглһнә болн региона һардвр ямаран керг-үүлдврмүд күцәхәр бәәхин тускар «Калмыкия» РИА-н зәңгчд келҗ өгв.

Усна төр йир нәрн төр мөн. Статистикин то-дигәр, Элст балһсна бәәрн күн нег хонгт дундлад 70 литр шаху ус олзлна, селәнд бәәдг күн – 40 литр, Әрәсән дунд үзмҗ – 140 литр. Эндр өдр таңһчд сән чинртә усар 7,4 процент әмтн теткгдсн бәәнә, орн-нутгт болхла дунд үзмҗ – 85,5 процент.

Ик Буурла багин усна сурвлҗн таңһчин әмтиг усар теткх зөвтә бәәсмн. Болв энүг чик кевәр эдлврт эс орулсн учрар эн көдлҗәхш. Ус хәәҗ бурһудсн 15 нүкнәс зуг дөрвнь олзлҗана. «Ус хәәҗ бурһудсн нүкд нег-негнәсн дегд өөрхн бәәнә, хоорндан хойр-һурвн метрт бәәдгинь тиигәрән одсн специалистнр илдксмн. Эннь техническ некврмүдлә ирлцҗәхш», - гиҗ Наран Кюкеев келв. «Усна сурвлҗиг шинҗлҗ бүртксн уга бәәҗ. Тегәд чигн турва эвдрдг йовдлмуд учрна», - гиҗ региона вице-премьер темдглв.

Тер учрар Әрәсән Федерацин Правительствин Ахлач Михаил Мишустин таңһчд ирсн кемд тосхлтын-техническ шинҗллт кех даалһвр өгв. Шинҗллтин ашар тосхгдсн объект төсвин шиидврмүдләнь ирлцҗәх угань, цуг энүнә блокмудын техническ бәәдлинь медгдх, эн туст цааранднь ю кехнь медгдәд бәәхмн.

«Эн төрт ик оньг тусхагдҗана, Бату Хасиков энүнә тускар орн-нутгин толһачд зәңглсинь чинртә йовдл. Әрәсән Правительствин Ахлач Михаил Мишустин таңһчд ирлһнә кемд тер мет РФ-н ЖКХ-н болн тосхлтын министр Ирек Файзуллин болн Әрәсән йиртмҗин көрңгин болн экологин министр Александр Козлов ирсн билә. Мадн эднд таңһчин төрмүдин тускар тодрхаһар келҗ өгвидн. Михаил Мишустин таңһчд нег өдрәр ирснә хөөн маңһдуртнь РФ-н тосхлтын министерствин, ЖКХ-н саңгин специалистнр ирҗ, экспертн болн методологическ дөң күргв», - гиҗ Наран Кюкеев региона болн орн-нутгин хамцу үүлдврин тускар келҗ өгв.

Усна төриг түдлго, бачм кевәр хаһлҗ, эн туст йирин биш шиидврмүд һарһх кергтә гиҗ Наран Кюкеев тоолҗана. «Мадн хара бәәлго, цуг эв-арһан һарһҗ, региональн болн федеральн бюджетмүдәс йилһҗ өгчәх мөңгиг олзлхар шунҗанавидн. Таңһчин бюджетин мөңгәр усар тетклһнә 3 объектин төсвин-тооцана цаасинь бел кев, дәкәд 2 объектин цаас белдҗәнә. «Тер мет таңһчин бюджетәс йилһҗ өгсн мөңгәр 2019-2020 җилмүдт усар тетклһнә 10 объект тосхгдв, эн кергт 103 сай арслң һарһгдв. Эн объектс Ик Царң, Цаһан Амн, Аршан, Чапаевск, Чилгр болн Садовое селәдт, Лагань болн Городовиковск балһсдт тосхгдв», - гиҗ эн темдглв. Таңһчин делгрлтин онц көтлврт дәкәд 32 объектин төсвин-тооцана цаас тогталһн орулгдв.

«Цевр усн» гдг федеральн төсвин йовудт 2019 җилд Лаганьд усна сурвлҗн тосхгдв, 2021-2022 җилмүдт дәкәд хойр объект Цаһан Амн болн Троицкое селәдт тосххар зуралҗана. РФ-н Правительствин дөңнлһәр эн көтлвр түргәр күцәгдх чигн. РК-н вице-премьерин темдглсәр, бас эн кемд дәкәд цөөкн объект немгдх. Тер тоод Яшалта, Ульяновское селәд болн Лагань балһсн, Элстин ус хадһлач орх. Чограйск ус хадһлачин усна чинринь ясрулҗ, Элстин ус хадһлачин тосхлтыг төгсәхәр бәәнәвидн. Эн төрәр мадн урднь РФ-н селәнә эдл-ахун министерствла күүндвр тогталавидн. Михаил Мишустин таңһчд ирсн кемд эн туст мадниг дөңнв. Эн объектин төсв ухалҗ белдхвидн.Левокумск гидроузел шинрүлҗ, Чограйск ус хадһлачин усна чинринь ясрулх санатавидн», - гиҗ Наран Кюкеев келв. Өдгә цагт Чограйск ус хадһлач Кума һолын усар дүүрнә. Кумо-Манычск каналд Терско-Кумск каналас ус орулх селвг правительств өгв. Шишлң тосхлтс кеҗ, Терек һолын усн Кума һолын уснла хольвлго шуудтан Чограйск ус хадһлачд тусхла, терүнә усна чинринь ясрх.

Элстд усна төр чинвртә төр болҗана. Элстиг Деед Яшкулин болн Баяртинск водозаборас усар теткнә. Олн җил хооран эдлврт орулгдсн эн объектс кезәңк кевәр көдлҗ, өдгә цагин некврмүдлә ирлцҗәхш. Элстиг усар тетклһнә төр нәрн. Тегәд эн төриг хойр девсңд хаһлхмн. Түрүләд водозабормуд ясҗ шинрүлхмн болн водовод тосххмн. Мөрн сарин нег шинд төсв белдлһиг төгсәхмн. Дарук девсңд усна сурвлҗ тосххмн. Терүнә төсвин-тооцана цаасинь белдлһнә көдлмшиг 2022 җилин дундурар төгсәхәр зуралҗана. Элст балһснд ус цеврүллһнә сооруженьсин шинрүллһнә төриг таңһчин делгрлтин онц көтлврт орулв. Көтлврин йовудт төсвин-тооцана цаасинь белдх, тосхлтын көдлмш кегдх. Эн туст тосхлтын министерств, ЖКХ-н Саң шинҗллһнә халхар нөкд болв. Эднә селвгүд, зааврмуд учрт авгдад, төсвд сольврмуд орулгдхмн. Төсвин-тооцана цаас тогталһна түрүн девсңгин көдлмш күцәлһнә төлә мөңгәр теткҗәнә. Болв мөңгн баһ болх гиҗ тоолҗана. Тегәд чигн мөңгнә кемҗәһинь икдүлх төрәр федеральн министерствсла күүндвр кеҗәнә.