Элст балһсна прокуратур онц арһлачин туст гемшәллһнә ашлвр һарһв. Тосхлтын көдлмш кеҗәсн кемд әәмшг уга бәәдл тетклһнә зокалмуд эвдснд энүг гемшәҗәнә.

Арһлач салң йовдл һарһснас көтлтә күн әмнәсн хаһцв. Энүнә тускар ведомствин барин цергллт зәңглҗәнә.

«Фаворитстройсервис» ООО-н болн онц арһлачин хоорнд Элст балһсна 4-ч микрорайонд 23-ч тойгта герин оран капитальн ясврин көдлмш келһнә туск бооца батлсмн. 2020 җилин үкр сарин 27-д герин мөстҗ одсн ора деер көдлмш кеҗәсн көдләч хальтрад, 15 метр өндрәс унад, аштнь зеткр болсн ормдан әмнәсн хаһцв. Эн зеткртә йовдлар бүтәгдсн керг-үүл Элст балһсна зарһин района 2-ч тойгта зарһин участкд хәләгдхмн.