Мана һазра күн Савр Шалбуров 65 киил күртл чиңнүрин багд сул янзин бөк бәрлдәһәр ЮФО-н чемпион болв. Хальмг бөк Әрәсән чемпионатд орлцх зөв авв гиҗ таңһчин спортын болн туризмин министерств зәңглв.

9 настаһасн авн спортар соньмсҗанав, Көтчнр селәнд, бәәрн бичкдүдин болн уйн наста баһчудын спортивн школд дамшҗанав гиҗ Савр Шалбуров «Калмыкия» РИА-н зәңгчд келҗ өгв. Тренер Алексей Горяев энүг ЮФО-н чемпионатд белдв. «Бәәҗ-бәәҗәһәд Дагестанд одҗ, тенд дамшдув», - гиҗ Савр келв.

Әрәсән чемпионат эклтл сар шаху цаг үлдв, тегәд терүнә күртл улм сән белдвр авх арһ бәәнә гиҗ эн иргч марһана тускар тоолвран медүлв. «Савриг болн энүнә тренермүдиг йилһән сән аш үзүлснләнь йөрәҗәнәвидн. Күцсндән төвкнлго, уралан зөрҗ, цааранднь чигн спортын халхар күцәмҗ болн шин диилвр бәрхиг дурдҗанавидн!» - гиҗ таңһчин спортын министерств темдглв.