Москва балһснд Әрәсән Федерацин Правительствин Ахлачин дарук Дмитрий Чернышенко Хальмгин Толһач Бату Хасиковла көдлмшч кергәр харһв. Харһлтд Әрәсән спортын министр Олег Матыцин орлцв. Энүнә тускар РФ-н спортын министерствин барин цергллт зәңглв.

Харһлтд «Демографь» гидг келн-улсин төсвин «Спорт – норма жизни» федеральн төсвиг күцәлһнә йовудт таңһчд физическ сойл болн спорт делгрүллһнә чинртә төрмүдин тускар күүндвр болв. Әмтн ик баһ уга даңгин физкультарар болн спортар дамшҗ чадхин төләд регионд таал тогтах, кергтә инфраструктурар теткх күслтәһәр федеральн төсвин керг-үүлдврмүд күцәгдҗәнә.

Тер мет харһлтын йовудт Әрәсәд кикбоксинг делгрүллһнә төрәр күүндвр болв. Бату Хасиков эн янзин спортар кесг сааҗ нарт-делкән чемпиона цол зүүсн билә. Тегәд чигн кикбоксинг өргҗүллһнә туск төрәр ухан-тоолвран медүлв.