Таңһчд усар тетклһнә көтлвр күцәлһнә төләд дәкәд немр 6,76 җува шаху арслң кергтә гиҗ Хальмгин һардвр тоолад һарһсмн. Энүнә тускар таңһчин вице-премьер Наран Кюкеев зәңглв. Энүнә тускар «ТАСС» ИА зәңглҗәнә.

Хальмг Таңһч усн эс күртҗәхин, усн ховр болдг регион болҗ тоолгдҗана. Усна тогталмудт минеральн тогтацнь дегд өөдән болҗана, тегәд усна амтнь давста. Өдгә цагт таңһчд зуг 7,4 процент әмтн сән чинртә усар теткгдсн бәәнә.

«Өдгә цагт усна чинриг өөдлүллһнә таңһчин көтлвр батлгдсн бәәнә. Энүнәс иштә 2022-2024 җилмүдт усар тетклһнә 38 объект тосхгдх, тер тоод Элстд чигн. «Цевр усн» («Чистая вода») федеральн төсвин нилчәр мадн зурһан усна объектин төлә 638,8 сай арслң һарһҗ чадхвидн. Таңһчин әмтиг сән чинртә усар теткх күслтәһәр дәкәд 32 объект тосхлһна төлә немр 6760,1 сай арслң кергтә болҗана», - гиҗ Наран Кюкеевин үгмүдиг «ТАСС» ИА заав.

«Цевр усн» төсвин йовудт зурһан объект тосхҗ, эдлврт орулхла, таңһчин 14,2 процент әмтиг уудг усар теткҗ болхмн, эннь 38,6 миңһн күн. Таңһчин көтлвр төгсәлһнә болн цуг 38 объект тосхлһна хөөн 2024 җилин чилгч күртл 82,3 процент әмтиг (223 миңһн күн) сән чинртә усар теткхмн.

«Эндр өдр мадн таңһчин социальн-экономическ делгрлтин онц көтлврин йовудт үлдсн 32 объектин төсвин-тооцана цааснь ухалҗ белдвидн, эн кергт федеральн бюджетәс 62,3 сай арслң һарһгдв. Немр мөңгн йилһҗ өглһнә туск төрәр Әрәсән правительствла күүндвр кегдҗәнә», - гиҗ Наран Кюкеев агентствд келҗ өгв.

Региона хойр селәнд усар тетклһнә объектс тосхгдх гиҗ эн немв. «Цевр усн» федеральн төсвин («Экологий» келн-улсин төсв) йовудт 2019 җилд усна тогталас лагань балһсн күртл утдан 5,3 дууна усна сурвлҗн тосхгдв. 2022 җил күртл таңһчин дәкәд хойр һазрт – Троицкое селәнд болн Цаһан Амн поселкд усна объектс тосхгдхмн, эн кергт 311 сай арслң һарһхар зуралҗана. Тенд шин водозабормуд, ус белдлһнә установкс, усна сурвлҗн, цевр ус хоршадг резервуар тосхгдх. Цуг эн объектсин нилчәр 18,5 миңһн күн сән чинртә усар теткгдхмн», - гиҗ Кюкеев «ТАСС» ИА-д келв. 

Троицкое селәнд ус хәәҗ һурвн нүк бурһудхмн, усна сорулын станц, ус цеврүлҗ белдлһнә станцс, тер мет цевр ус хоршадг хойр резервуар тосххмн, 1,5 дуунад усна турва татгдх, ус булҗ, турваһар төгәдг хойр башнь тосхх, усн ширгҗ оддг боодгуд кех. Тосхлтын үн 107 арслң тогтаҗана.

Цаһан Амн поселкд усар тетклһнә кесг объекст тосххар зуралҗана, тер тоод усна сорулын станцс, ус цеврлҗ белдлһнә станц болн нань чигн. Цаһан Амнд күцәгдх көдлмшин үн 204 сай арслң тогтаҗана гиҗ таңһчин вице-премьер темдглв. Кюкеевин келсәр, җил болһн таңһчин бюджетәс усар тетклһнә объектс тосхлһна төлә мөңгн һарһгдна. Сүл хойр җилин эргцд Хальмгт ут тоодан 103 сай арслң һарһҗ, 10 объект тосхгдв. Эндр өдр таңһчин бюджетин мөңгәр һурвн объектин төсвин-тооцана цаас ухалҗ белдв. Энүнә нань Хальмгин делгрлтин онц көтлврин йовудт федеральн бюджетин мөңгәр усар тетклһнә 32 объектин төсвин-тооцана цааснь бел кев. Өдгә цагт эн объектсин тосхлтыг мөңгәр тетклһнә төр хаһлҗана.

Лу сарин 2-т РФ-н правительствин Ахлач Михаил Мишустин Хальмгт ирсн кемд Әрәсән тосхлтын министерствд болн «Росгеологийд» таңһчиг усар тетклһнә туск төриг шинҗлҗ, эн туст селвг орулх даалһвр өгсн билә. Моһа сарин нег шин күртл болзг темдглсмн.