«Туту.ру» зуульчллһна туслмҗ күргдг компань Әрәсән хамгин өвәрц бумбсин энциклопедь тогтав. Орн-нутгин 85 регионас «СкульпТУТУра» гидг цугәрәсән марһанд орлцсн объектс терүнд орв. Эн марһан 2020 җилин хулһн сарас авн экләд, 2021 җилин туула сарин күртл давв. Тувинск бичмрин бумб марһана дииләчнь болв. 100 орлцач Әрәсән хамгин өвәрц бумбсин энциклопедьт болн интерактивн картд эврә орм эзлв, гиҗ «Туту.ру» зуульчллһна туслмҗ күргдг компань зәңглҗәнә.

Хальмг Таңһчин «Йөрәл» алтн титм» («Золотая корона «Йорял») бумб энциклопедьт орв. Энүнәс нань Туту.ру баг зун бумбин ик чигн кевмүд кеҗ белдв, цуг объектсиг эргүләд, олн зүсн таласнь хәләһәд, соньн тоот медҗ болхмн. Бумбин түүрвәчин тускар, бумб юунас кесинь, кемҗәһәрн ямаран болдгинь медҗ болҗана, тер мет бумбла залһлдата домгудла таньлдҗ болхмн.