«Сән кец-таалта балһсна бәәдл тогталһн» гидг федеральн төсвин йовудт таңһчин 11 муниципальн бүрдәцд олн улс хурҗ амрдг һазриг ясруллһна көдлмш кегдҗәнә. Энүнә тускар Хальмгин ЖКХ-н болн энергетикин министерств зәңглҗәнә. 

Таңһчин Толһач Бату Хасиковин даалһврар эн туст белдврин көдлмшиг давсн җилин үкр сарас авн экләд кесмн. Муниципальн бүрдәцс олн улс хурҗ амрдг һазриг ясруллһна көдлмш кехин туст марһа зарлсн болдг. Эн кергиг урдаснь кех кергтә. Тер юңгад гихлә, эртәснь тосхлтын болн ясврин көдлмшиг эклҗ кеһәд, зунар төгсәхлә, әмтн җилин дулан кемд ясрулсн, сән кец-таалта һазрт амрч чадхмн.

Келхд, Целинн района Вознесеновк селәнд мемориальн комплексин өөр-шидр цутхлң скверин бәәдлиг ясрулхмн. Энд зүсн-зүүл көдлмш экләд кеҗәнә. Шамар теткхәр электрокүчнә сурвлҗн татгдв. Скамейкс тәвх һазр белдҗәнә, әмтн йовдг хаалһс кехәр һазр ясҗана. Лагань балһснд В.Ленинә нертә паркд һазр малтад, электрокүчәр тетклһнә төләд һазр дор сурвлҗн татгдв. Тер мет бичкдүдин талвң бүрдәхәр һазрин участк ясҗ белдҗәнә. 

2021 җилд «Сән кец-таалта балһсна бәәдл тогталһн» гидг төсвд Элст, Лагань болн Городовиковск балһсд, Комсомольск, Приютн, Троицк, Вознесеновк, Виноградн, Лазаревск, Красинск, Улан Хол селәд орлцхмн. Муниципальн бүрдәцст әмтн дууһан өгснә ашар амрдг һазриг шүүҗ авч ясрулх шиидвр авна. Тегәд чигн бәәрн улсин тоолвриг учртан авч, олна һазриг ясҗ шинрүлнә.