Казань балһсна школд һашута йовдл учрсна хөөн сурһулин учрежденьст әәмшг уга бәәдл тетклһнә туск төр босхгдв. Өөрхн иргчд орн-нутгин регионмудын һардвр эн туст бүртклһ кех гиҗ Әрәсән сурһуль-эрдмин министр Сергей Кравцов темдглв.

Тер мет Әрәсән Президент Владимир Путин школмудт әәмшг уга бәәдл тетклһнә болн терроризмәс хөрлһнә туст негдсн эв-арһ олзлхин туск даалһвр правительствд өгв. Сурһуль-эрдмин заведеньст әәмшг уга бәәдл тетклһнә туст негдсн некврмүд өөрхн иргчд ухалҗ белдхмн гиҗ сурһуль-эрдмин министр Сергей Кравцов темдглв.

Хөн сарин 11-д таңһчин Толһач Бату Хасиков министерствсин, зөв-йос харлһна халхин болн муниципалитетмүдин элчнр орлцлтаһар селвлцә һардҗ давулв. Керг-үүлдврин йовудт һол төр – сурһуль-эрдмин учрежденьст бичкдүдин әәмшг уга бәәдлин туск төр хәләгдв. Школмудт әәмшг уга бәәдлин систем үүлдҗәхин тускар күүндв. Муниципальн бүрдәцсин толһачнр әәмшг уга бәәдл тетклһнә туст дамшлтарн хувалцв, зөв-йос харлһна халхин элчнр эн туст күцәҗәх көдлмшиг ямаран кевәр кехин тускар селвгүд өгв. Казань балһснд зеткр учрсна учрар Хальмгин сурһуль-эрдмин учрежденьст әәмшг уга бәәдл тетклһнә халхар чаңһ некврмүд тәвгдҗәнә. Эн туст таңһчин сурһуль-эрдмин болн номин министерств ирлцңгү заквр батлв. Организаст әәмшгтә йовдлас саглуллһна бәәдлиг бүрткх, багшнрин дунд цәәлһврин көдлмш күцәх, эн төрәр сурһульчнрин төлә шишлң кичәлмүд, эк-эцкнрла хургуд бүрдәҗ давулх, эк-эцкнр күүкдән ик оньган хәләтхә гисн селвгүд сурһуль-эрдмин болн номин министерств өгчәнә.