Одахн Хальмгин правительствин Ахлач Юрий Зайцев, эрүл-менд харлһна министерствин, таңһчд үүлддг Роспотребнадзорин заллтын, социальн делгрлтин, күч-көлснә болн көдлмшәр тетклһнә министерствин һардачнр Әрәсәд коронавирусн гем тархалһиг хөрлһнә бачм штабин сүүрт орлцв. Әрәсән правительствин Ахлачин дарук Татьяна Голикова керг-үүлдвриг һардҗ давулв. Сүүр видеоконференц залһлдана эв-арһар давв.

Әрәсәд, тер дотр Хальмгт, әмтн коронавирусн хальдврта өвчәр гемтсн йовдлмуд баһрҗахнь темдглгдв гиҗ таңһчин правительствин барин цергллт зәңглҗәнә. Энүнлә дегц коронавирусн гемәс саглуллһна вакцин кеҗ һарһлһна кемҗән өсҗәнә, тәрлһ кедг бәәрн олар секгдҗәнә. Эндр өдр Хальмгт эдгсн улсин то 96,7 процент тогтаҗана, Әрәсән дунд үзмҗ –92,1 процент. Коронавирусн гемәс хорсн улсин то (1,7) Әрәсән дунд үзмҗәс (2,3) дорхнь баһ.

Эндр өдр таңһчд 43310 комплект вакцин авч ирв. 34685 күүнд V1 вакцин тәргдв, 25443 күн V2 вакцинә тәрлһ авв. 41,6 процент шин авч ирсн вакцин балһсна әмтнә төлә олзлгдх, 58,4 процент - таңһчин райодыг теткх. 2021 җилд тәрлһ келһнә керг-үүлдврмүдин зурала ирлцүлҗ, 123 миңһ һар күүнд тәрлһ кехмн, ода деерән эн тооһас 28,1 процентнь тәрлһ авв.

Өдгә цагт орн-нутгин көрңгәс мана таңһчиг хальдврта гемәс саглуллһна хамг тоотар тетклһнә туст ик көдлмш кегдҗәнә. Эмнлһнә учрежденьсиг болн олн улс хурдг организацсиг чирәдән зүүдг халхцар, һаран цеврүлдг шишлң эв-арһар теткхмн.